أنثى - محمد الشهري
قالت بلهجة شماته وانتقاص مْن الرجل
السعاده مثلي انثى والحزن مثلك مذكّر
والحياه انثى .. بعكس الموت وافهمها لجل
تعرف ان الجوّ لو يخلو من الأنثى تعكّر
شفت وشلون الضمير الأنثوى .. يملك سجل
قلت: طيب وش تقولي في ذكورة لفظ سكّر
قالت: امْحق .. واصرخت بي وفي ملامحها وجل
أنت ويّاك النقاش يضيع وابوابه تسكّر
ودي انّك تستريح شويّ .. وتحسّ بخجل
وان طريت "انثى " فلازم تحمد الله واتشكّر
قلت: ربي ودايم اشكر نعمته عز وجل
إنتي نعمه .. ما اختلفنا وماني لله ْمتنكّر
مير خلّي عنك اساليب اللكاعه والدجل
واسمحي لي بس من باب الغلا .. ودي أذكّر
العقل نعمه .. ويبدو إن تفكيرك عجل
يعني هذي آخرة تفكير عقلك .. يوم فكّر
لو على هذا الأساس نقيس ياحلوه .. أجل
الخيانه مثلك انثى .. والوفا مثلي مذكّر