قيظ ..وسراب
صاحبي لا تلحق الدنيا حسافه
لايسج بنا هديل الراعبيه

ياعشيري وش بقى ثاني نخافه
بالدروب الموحشات السرمديه

مادريت إنا تقاسمنا المسافه
نص لي ونص مكتوب عليه

ليه أمل من الطريق وليه أخافه
والمدى قيض وسراب ومهمهيه

ماورى ريع الطعون إلا الكسافه
كل ما أذبه وأشيل السامريه

وانت ياطهر الصباح وياعفافه
لا تصافحني بحد الحضرميه

لايغرك نبض كفي وارتجافه
ضاق بي قلبي وشلته في يديه