ليلك نثر عطره - مساعد الرشيدي

ليلك نثر عطره على شاطي النيل
وانا ضواني ليل نجد وسريته

يامطوّل الغيبات يامطول الليل
توّي دريت انّه سواد وجفيته

أثر النجوم اكثر من الجدي وسهيل
نجمٍ كتب همّي..ونجمٍ محيته

ياصاحبي عطشان..عطشان لك حيل
مظمي وهمّال السهر ماقويته

رد السلام لمترفات المناديل
كحل العيون ودمعك اللي نسيته

الدرب ميت والخطاوي مقاتيل
وان لاح طيفك مت فيه وحييته

الله على الضحكه نهار المواصيل
هاك النهار اللي بعمري فديته

قبل اتقهوى من كسالا مظاليل
قبل السلام وقبل جاني وجيته

ضم الحشا واكسر جمود التفاصيل
ماعندي اغلى من خفوقٍ كويته

لمصافحك كف وقصيد وهلاهيل
اما زبنك القلب ولاّ خذيته

لويغري القمرا ذبول القناديل
بعت النهار لجيتك واشتريته

يوم انتثر عطرك على شاطي النيل
انا ضواني ليل نجد وسريته