هذي علومي - مساعد الرشيدي
تفهق الليل الادلم والهوا ساكن
وانا هنا ياسبب همي وتسهيدي
في خايع من نفيض الوسم متماكن
نبته يليق بتمدري نافل الجيدي
متموج بين عشبي واخضر داكن
وامعفر من نسايم جرهد البيدي
يا مودعات السنين من العمر هاكن
تالي تباريح بالي في ضحى عيدي
ويا مدلهات الحشا مدري وش ألهاكن
أونس بصدري مثل فوح البغاديدي
هيلن علي من رذاذ الحلم يفداكن
وجه قصر عن حياه وقلب رعديدي
يجلا غثا الكبد يوم اشتف من ماكن
شف العسل بين أشافي ترفة الغيدي
واللي جمعكن بوسط الصدر وانشاكن
إني لا حطب لرعدكن من تناهيدي
هذي علومي وستر الله وعفاكن
لحقن مصاديري العطشى مواريدي
والا هبوبي رفيعة شان شرواكن
النقص ينقص عن الحروه وانا ازيدي
هيضني الضلع في كبد الثرى راكن
وان حدك الضيم قل للضلع ياسيدي
واركيت ظهري على ظل الجبل لكن
ماجت مواعيد ظله مع مواعيدي