نامي .. - مسفر الدوسري
انتي نامي..
مو مهم انك رميتي..
قبل شوي جمرك
بين جفون العين..
وبغفوة منامي!
نامي
لا يهمك إن قلبي..
كان قبل شوي في مرمى سهامك
وكان حبك متقي..
ضربة سهامي!
لا يهمك لو يموت قلبي
على سدرة أمانك
وفرحتي..
وهديل حمامي!
لا يهمك صبحي المذبوح
واحزاني
وظلامي!
انتي نامي..
لا يهمك مُر بمراية كلامي
لا عتب قلبي عليك
لا ولا حنظل ملامي
نامي بسم الله على حلمك
من اشواك الأرق
ومن عطش صحرا الورق
ومن ألم فالقلب دامي.
نامي.. ياللي..
من كتبت اسمك.. محيت..
من نخيل الذاكرة..
كل الأسامي!
ومن رسمتك غيم في عمري وأنا..
بموت.. ظامي!
نامي..
لا يصحّي غفوتك
صوت الضمير
أو تقولي حزني منك
والا من قاسي كلامك
لا ياعمري
«ربَّ حزنٍ»
يقتل ابن آدم كذا..
من غير رامي!
نامي..
انتي ليلك..
يا بعد عمري قصير
أما ليلي..
في مدى عيني امتنامي
يمدي لو بنام باكر
والا بعده
والا لما اطوي آخر
صفحه
في قصة هيامي.
المهم إن انتي نامي
تحرسك ملايكة شوقي
وغرامي!
يحرسك..
قلبي اللي لك..
يعلن وفاه
كل ما أعلنت انهزامي!
وانتي..
أنتي نامي..