يستاهلك هـ الجو - مسفر الدوسري
الجو جميل اليوم
يستاهل احساسك
غيم ورذاذ ناعم
صبي الندى بكاسك
خلي ربيع الارض
رجلينك البيضا
و شال السماء راسك
امتدي طول الكون
امتدي عرض الكون
توزعي صيري
في كل شئ حولك
نبض
و صفا
و عيون
خلي قزح ريشه
و الدنيا كراسك ..
اليوم بأمكانك
تعدين رسم الكون
على هوى جنونك
و فوضاك
وهوجاسك
خلي خيوط الشمس
و اللي انفذت غفله
من بين هذا الغيم
خليها لون ازرق
و خلي السحاب اخضر
و لون المطر اورنج
و ثوب الشجر وردي
و بنفسجي فاتج لون الغصون
و الناس .. ممكن تكون حمرا
ممكن تكون صفرا
ممكن تكون اي لون
اختاري لون ناسك
اليوم انتي الكل
و الكل فيك انتي
اليوم كنه جاي قدك على قياسك
خلي الجنون اللي في داخلك ينطق
صبي البحر في البر
وسمي المواني شيح
خلي نجوم الليل
على الدروب تطيح
و تنبت على الاسفلت
وفوق في السما رشي
ياقوتك و ماسك
و لمي اللي متبعثر
او بعثري اللي تشوفينه متماسك
عيدي الحياة للموت
واغريه بانفاسك
ولا اقولك شئ
ليش ما تجين يمي
نحضن سوى غيمه
نبلل عواطفنا
و ننثر ورود حمراء على شفايفنا
و قلبي يبوس قلبك
كل ما الرذاذ باسك
تعالي و نعتق
جمال هذا الصبح
في كاسي و كاسك
ونشرب طوال اليوم
من ماي نشوتنا
مع هالمطر
و الغيم
و احساسي
و احساسك ..