ياوجودي - ممدوح المرزوقي
الا ياوجودي وجد من داس بالدينين
ولده الوحيد اللي به النفس مفتونه
على رجعته دوبه زرق مادرى المسكين
وتوطاه بالجنزيرعينه لطبلونه
وعلى صيحته يوم انتبه للولد قسمين
صرخ صرخةٍ وأغمي عليه بدرقسونه
وجو فازعين الناس من صيحة الاثنين
وجتهم تصيح امه من العلم مجنونه
تطيح وتقوم وتركض ولاعليها شين
وإتضمّه باياديها وتبكيه مغبونه
وطاحت عليه بعد جرّت لها صوتين
وصاب العرب جضّه من اللي يشوفونه
والاسعاف سدّوا دونه اهل الوفاء والدين
لكن الحياه اللي تشوفون ملعونه
توفت امه بعده قهر ماخذت يومين
وهي توّهاغظّه جميله ومصيونه
ولافاق ابوها الابعد مامضى شهرين
وجاه الخبرعنها من اللي يزورونه
وخلاّ السرير وراح للمقبره من حين
وشاف بعيونه نجلة العين مدفونه
وجذب ونةٍ يبكي صداها الحجروالطين
وتوفّى وهويفرك على القبر بوجونه
تريّح وانا اجاوب ونين القهروالبين
واجاوب حمام الورق لاناح بلحونه
واهجّل على الاقدام وامشي مع الماشين
لكني مع الهاجوس والهم وشطونه
واساهرانجوم الليل واصبح مع الممسين
واناغايبٍ ذهني ولا احيط في كونه
اشوف البحرمن يوم عفت الحياه إطحين
ولاني ببيّن سرّ قلبي ومكنونه
ولا امسى علي اليل وامسوا به السالين
اجر الونين ويظهرالقلب مخزونه
الا وعذاب القلب الا وعذاب العين
الا وعذاب الروح والروح مرهونه
طريح الهوى يبكي على زامي النهدين
ليا غاب عن عينه وهوقاصرٍ دونه
وانا كني اللي حط في قلبه السكين
ولاله خصيمٍ يبرد الكبد بطعونه
يضمد جروحه مع غثا الوقت ست سنين
ومن غاب ذهنه في يده يطرف عيونه
ولو العن الشيطان ماينفع التلعين
وقعت بكمين ابليس والنفس مديونه
الاياهلي واحسرت القلب والعينين
فضا البيت بعد ازعاق الاطفال بركونه
ليا جيت داخل كن يضغطني البكلين
من الضّيقه اللي تضغظ القلب وتخونه
تهل العيون ودمعها يحرق الخدين
على اللي بصدري زايد الهم يجلونه
وياكسرقلبي بعدهم مثل كسر الصين
وياتلّته تلة غريمٍ يتلّونه
انا لو اشق الثوب من بعدهم نصيّن
عسى لايمي يبلاه ربي بطاعونه
وانا لو اهيم اجنان بفراقي الغالين
عسى لايمي يفقدعياله ومضنونه
وانا لو اقفي عن حياتي مع المقفين
عسى لايمي يقفيبه الوقت وظعونه
بشد الرحال وبترك الدارمن ذالحين
عسى لايمي بابوه وامه يقصّونه
كفاني من الدنياسهمهابعام الفين
صويبن دكاترة البلد مايداوونه
وابا اصبرعلى بلواي لو المفارق شين
عسى الله يفرجها والارزاق مضمونه
ولامت حطوا بالنصايب على بيتين
ترى سنه الله للمخاليق مسنونه
الايابن ادم لوصفالك زمانك زين
توقع ترى الايام ماهيب مامونه
تبسم لك الدنيا وتبدي لك السنّين
وياسرع ماتاطى على الراس ومتونه