ياخايفه منّي - ممدوح المرزوقي
ياخايفه منّي وانا منك مرتاب
مزروع دون الوصل خوفٍ وريبه
مضى عليّ الليل واقف على الباب
وانتي مع الشباك عينك رقيبه
وهاذي سوات الحب مابين الاغراب
انا غريبٍ عنك وانتي غريبه
اتوق مير الخوف من ذنب وعقاب
ومن الزمان اللي طعنّي نديبه
ياهيه لو لايه من الخلق منصاب
والجمر الاحمر زد كلاني لهيبه
لاجيك لو آطا على هامة الداب
ترى المسافه بين الاحياء قريبه
لكن خايف من عذولٍ وكذاب
يمشي على نور القمر ويحكيبه
اليوم حنّا في زمن ماله إثياب
ومبدى الشهر بالليل ماينسريبه
ما قلته الا من تجاريب وحساب
اكلت من شوكه ويابس عسيبه
وجرحه عطيب بضامري مابعد طاب
انا ضحيّة هالزمان وصويبه
ياما على الابهام عضيت الانياب
ودموع عيني فوق خدي سكيبه
والنار في صدري تلهّب تلهاب
من كود ماجاني وعظم المصيبه
الضيق والعبره وتقفيل الابواب
واللي جرالي للعدا يندعيبه
عبدٍ خلقه الله تعاقبه الاسباب
يوم آتذكر بالليال العصيبه
لكن خلينا على ستر وإحجاب
وصكّي حديد النافذه يالحبيبه
ما عاد إلي بالحب مبدى ومرقاب
مادام دون الوصل خوفٍ وريبه