على شانك ياابن محجان - ناصر الفراعنة

هلا باللي ضرب جوفه وساقه ضيم سرجوفه
على صفوة صفا قافه يموتني ويحييني

سقى الله يا زمانٍ شوشته من خلف منسوفة
تقفّيته بكرباجي وهو كان امتقفّيني

حريره ما يناسبني ولا جاوب معي صوفه
لعب بي لعبة الجاهل بجنبيّة وسكّيني

سعودٍ كان نفسه من صدوف الوقت مشعوفة
تراها ما صفت قبله لسكران المجانيني

ليالينا على ما قيل محسوبة ومنتوفة
بكارٍ لقّحن يوم انتحن تسعة وتسعيني

على شانك يا ابن محجان أطق الراس بالطوفة
وأبيّن ما خفى مني وعلم الناس خافيني

أنا لك محزمٍ وافي وادوس الداب ما اشوفه
عشانك أنت والا اللاش له دينه ولي ديني

ابن محجان حرٍّ له على وكر الوفا نوفه
وانا في معرفته افخر إلى غابت شياطيني

رَجَل ترثة رياجيلٍ بفعل الطيب معروفة
وله عندي مقامٍ ما وصَله إلا السلاطيني

عسى يفداه من لا صاد طيب ولا كسب حوفه
طويل الذيل ابو زنبيل من عمّار وحصيني