الدنيا حر - أسماء الجنيد

لمن تكون صافى المطر
تسقى الحنين غيمات ضهر
تجنى الأمر آخر العكر..
مافى مفر .. ما الدنيا حر..
حين تنشتل في قيف بحر
للموج رفيق للطين وزر
ما تفتكر صفق الشدر
عايش معاك فصل العمر
ما الدنيا حر..
لازم يجف لونو السمح
يصبح كتر ..
والضل يهيم تارك الشدر
واقف حزين نصو انشطر
يمكن يعود بعد الفجر
وامكن يكون مر وعبر
ما الدنيا حر ..
لمن تلم نصين شتر
تغزل خيوط صبحت وتر
ما تفتكر نسجك غنا
لحنك عطر..
ما الدنيا حر
وكيف تنتصر وانت النفر
وسط الجيوش جاتك دفر
مزروع دريبك شوك سدر
طعناتو في نص الضهر
والدنيا حر ..
وكتين يفيض شوقك دفر
ضامى الخدار حزمة زهر
ضافر النخيل جرتق نضر
ما تفتكر الكون حضر
والنيل طمح غطى الصخر
ما الدنيا حر ..
وكتين تصوم كايس الفطر
عز الهجير ريقك حجر
ما تنتظر فجر القدر
ما قال صبر
لكن صبر لمن فتر
ما الدنيا حر ..
ما الدنيا حر
الدنيا حر