صور تحچي - جابر الشكرجي
صورة (1)
اهوايه اعرف ناس ما تگدر اتعيش
وهيه نفس الناس ما تگدر اتموت!
حته من تسألها وتگللها: ليش؟
يخجل اعله السانها حته السكوت!
صورة (2)
چنت اعزَّه وچان أكثر
من أخوي اوياه عشت
چان يحچيلي ابصراحه
وحته بالماتنحچي ايگلي رحت
وچنت اسولفله اعله سري
وما اضمّ اعليه چنت
بس عليه اعتب اهواي
لئن لمَّن مات ما گلي متت!!
صورة (3)
يرتعش كل جسمي.. كل حيلي يذوب
من يخبروني العزيز العندي مات
شگد احبه بس اخاف أگرب اليه
ثبت عندي الموت أقوى من الحياة
صورة (4)
كلشي ابطريقي احترگ
لا فرح ضل لا صدگ
صبخه وكحلها الملح
واشلون غصني يطگ
مچلوب جرحي عَلَيْ
يسعر ابروحي ويدگ
گوه امن اجرّ النفس
بين انطفي وأعتلگ
جيت ارد اشم الهوه
إلگيت الهوه مختنگ
جيت ارد ابرد الجرح
شفت الثلج يحترگ
حته الثلج يحترگ؟!
صورة (5)
خجل سوگ الهرج هوَّه ودلاليله
وما چان الخجل لهل الهرج عاده
بس السالفه حسباتها اطويله
داست بالعظم واتعدّت ازياده
مزاد وكل سعر مجبور ترضيله
وارخص سعر صاير مستحه الساده
عليمن تسجد ولله تصليله
وعلى مود الخبز باعَو السجّاده
من زمن الحصار – بغداد 1996
صورة (6)
ما ظل للجروح امچان
صدري والچبد قبَّط
لعب بينه الوكت يفلان
لِعَب لِعْب الخضيري ابشط
اشما احسب يرد مگلوب
واحسبه اردود يتخربط
ايضيع احساب اليحسبون
لو وزانهم (ضرّط)
صورة (7)
چا وينچ سفينة نوح
من ازمان اجه الطوفان
غرگت للأمل چم باب
غرگت للوفه بيبان
ما عدنه جبل عالي
حتَّه ننقذ الوجدان
الضمير اندفن وسط الروج
مات ابوسط كل إنسان
صورة (8)
الليل باگ الشمس
شتشوف بعد العين؟
ينخاف من الدرب
ظلمه ويذبني وين؟
خلوني وحدي أظل
خلِّيكم ابعيدين
بس لا يجيني خبر
عن حالكم مو زين
صورة (9)
أحس گام الندم ياكل بالعظام
واتگلَّب على افراش الملامه
بعيوني ندم ما تگدر اتنام
وگامت تحرگ اعيوني الندامه
امگابل جرح ليلي وجور الأيام
وكل ساعه عَلَيْ يوم القيامه
وكل يوم اليمر خمسين ألف عام
خمسين ألف عام اشلون أنامه
صورة (10)
خايف باچر الأيام شتجيب
واخاف الگمر يبقه اسنين غايب
وتصير الدنيا ظلمه وكلشي ما شوف
ولا بابي يدگوها الحبايب
واتنطَّر اعزاز وجيَّة اعزاز
وها بلچي الطريق اخبار جايب
بنصاص الليالي أفز مرعوب
لئن فراشي لدغات العگارب
صورة (11)
أول مره اشوف الدمع يحچي
أول مره اشوف افراشي يبچي
ثلج شمس النهار وليلي مجروح
وآنه بنص البحر چا وين اوچِّي
صورة (12)
أشرد من جرح أعثر ابجرحين
أمسح دمع عيني دمّي ينزف
وتاخذني الليالي وين ما وين
ويظل الليل بيّه ايدور ويلف
يراويني صور ويجرّح العين
وصوت الذكريات المُرّه يهتف
اشلون انسه المضه وذيچ السچاچين
چا يمته الزمان اوياي ينصف
صورة (13)
صار اسنين أصرخ: "مسَّني الضُّر"
ولا مرَّه احسبتني مثل أيوب
چا ذاكَ نبي وما يحمل المُر
شفت مُر للحديد ايموعه ويذوب
صورة (14)
الثار من يسكت يطگ حلگ الجرح
وينفجر بركان ساعات السكوت
اتموت بعيون الأمل شمس الصبح
لا أگول الدنيه من يسكت تموت
صورة (15)
من تمر العاصفه ويصرخ الريح
الدنيا من حاله تصير الحاله
ويوگع الزيتون بشفاف التراب
وتحضن الغيمه السمه واهلاله
وتوگع اغصان الورد والياسمين
ويمد طوفان البحر شَلاَّله
ايصير منظر شاعري ابعين الزمان
وكلمن ايصور اشمرّ ابّاله
ذنِّي عالرسام لوحات الجمال
وذنّي عالزبال كومه ازباله
فرق بين اليعشگ الدنيا ويعيش
وفرق بين ايموت وسط ازباله
صورة (16)
لا بد الظالم ايموت وينتهي
اويضحك اعله الطاغيه حلگ الگبر
وياخذ المظلوم ثاره من التراب
عود يسحگ عالگبر لمَّن يمر
صورة (17)
بعدچ يم علي اتلمين بيدچ دم
بعدچ يم علي تبچين حسره وهم
چا يمته الزمان اينشِّف ادموعچ
ويمته البيت من الفاجعه يسلم
مو كافي بعد نشهگ ابشرب الماي
وصار املبَّس العريس كومة سم
ايطشِّرنه الوكت ما بين خوف وخوف
بس اعله الجنايز ناسنه تلتم
صورة (18)
چا وينهم چانت گبل خبصه الشوارع
وانه عايش بينهم
وچانت مراجيح المحبه اتهزني
هزة شوگ بين ايدينهم
أحلامهم كسرة خبز واعله القناعه
چانوا امربينهم
چنهم مشوا لو لا أظن
عالموت نامت عينهم
اشگد دورتهم.. ما لگيتلهم أثر
حته الصده وياي ينده وينهم
چا وينهم؟
صورة (19)
أوجّ روحي شمع للجاي من ابعيد
واطشّ حبَّات عيني املبَّس الجيته
أتلگاه رِكِض وألبس الثوب اجديد
واصيحن صيحة المجنون لو شفته
صورة (20)
حزني اعله النزيف الماسكت يوم
وما شبعت الگاع امن الضحايه
وحزني اعله اليتامه ودمعة الليل
مصايب راحن وآلام جايه
تعودنه اعله چلمة آه ويلاه
بده بينه الحزن يمته النهايه
وصوت الأمهات ايفزز الثار
چا يمته ترفّ للثار رايه
صورة (21)
يضحك طلع من مشفى المجانين
وچان اسنين بالمستشفى نازل
يمشي ابكبرياء الما اله احدود
يريد ايطير چنه اجناح شايل
گتله: اشبيك عمي؟ اشدعوه؟ شتريد؟
اتهدَّه وصير لحظه انسان فاضل
گلي: اهوايه آنه احسن امن الناس
لئن عندي شهاده اتگول عاقل
اومنو عنده شهاده اتگول عاقل؟!
صورة (22)
يمتانيه ثوب العرس
ما مش عرس
خجلان ضم روحه الگمر
واستحت تطلعلچ شمس
الهلهوله ماتت وانتهت
والشمعه نامت ما تحس
لا حنَّه لا ماي الورد
لا بدله بيضه وتنلبس
ما مش عرس
العريس ردوا حنَّته
مستشهد ابليلة أمس
صورة (23)
گالت راح ابوي ايجيب من السوگ
خبز ويريد كل البيت يتغدّه
واحنه ناطرين الجيته اعله الباب
جزه وكت الغده وتعدَّت المدّه
واجانه الليل لا صوت اليهزِّ الليل
ولا ريح الهوه ونلگه الخبر عنده
دوَّرنه الولايه والشوارع ذيچ
حتَّه الگمر عنّ الوالد انشدّه
لگيناه عالرصيف ابقنبله مذبوح
بس كسرة خبز چانت على خدّه
صورة (24)
ودَّعني الصبح والعين بالعين
مثل كل يوم گام وباس ادّيه
گال: شتامري يُمَّه اشتريدين
گولي ادللي يُمَّه عليّه
رايح للشغل بلچي الشغل زين
واريدچ تندعيلي عَلَى الجيّه
ومن ارجع اجيب الخبز وياي
وجيبنلچ دُوه من الصيدليه
راح وأحس روحي راحت اوياه
وكل دنياي صارت اله اربيّه
اهناك وصوت يُمَّه ايصيح مخنوگ
تعالي وشوفي يُمَّه اشصار بيّه
اركضت للمصطر الگيته اشليگيته
امگطّع عله اتراب الكاظميه
عرفته من حليبي النزف عالگاع
وعرفته من الشفايف هيّه هيّه
اثاري من الصبح مدّاين افلوس
وجايبلي الدوه امن الصيدليه
بغداد – أيلول 2005
صورة (25)
تودعها ابصحن زينب
اتريد اتروح ما ترجع؟
اعله متن الوالده تبچي
الدنيا اعيونها تدمع
تدري چلمة التوديع
اشد من الجرح توجع
خايف بالوداع اتطيح
الكون ايطيح من توگع
صورة (26)
مرات عندي حچي صعبه عَلَيْ ينظم
مرَّات أگولن چذب وطلايبي تلتم
أوصل الحدّ الجزع واستغفر وأندم
كل الموائد تجي وتتقدم المريم
إسماعيل لمَّن عطش شو فجّرت زمزم
چا ذوله ما وارثوا تفاحه من آدم؟!
صورة (27)
سهله من اغيِّر كل مواعيدي
واغيِّر كل سلوكي اومنهجي اوفكري
بس صعبه عليَّه وما تجي بإيدي
ما أگدر أأجل ساعه من عمري
صورة (28)
تره حته الطفل حب التملك بيه
يسكت من تحط بيده ربع دينار!!
صورة (29)
اليضحك وجوَّه الضلع تنزف اجروح
هذا اعتبره نبي وأعظم نبي !