حاير - جمعة الحلفي
حاير...
دايره الدنيا
وانه ويَّ الدنيا داير
مبحر.. ومدري لوين يريد بيه الموج
دوختني الدواير..
شايل شراعي مثل راية حزن
مركب بنص بحر ضايع
شايل شراعي وشواطيك بعيده
ولاني رايح لاني راجع
ضيعتني.. وضاعت سنيني غُلب
ولانه گادر اشتريك ولانه بايع!
ذابله أيامي مثل نخله وحيده على الشرايع
واگف بآخر سنين العمر
ناطر لاچن ماني ناطر
ليلي طال وحزني يتناسل حزن
أبچي... تنزل دموعي خناجر
ومن كثر حزني غدت روحي مگابر.