النواقيس - جمعة الحلفي
الحچي ودمع المراسيل
البچت بين الظروف
والغنه وحس الربابه
وسمع المعاند يشوف
وانتَ وطيوفك سنابل ..
تنحصد دم بْبيادرهم تطوف
يا غلاتك راهب يرتل صلاتك
والكنايس تشرب الحان الحروف
والنواقيس التسجل صوتك أنته
وشاح رايه،
كتاب شاهد ما تَعْرف وراقه خوف
وأنبياء الناس تصعد للجرح تنزف صلاه
وانتَ بحبال المشانق صوت يدوي
وانتَ بهلال المآذن جنه تضوي
وانتَ لعيون الزغار .. وشاح وطيور وقصايد
حمَّلك شاطينه غيض
ويه النبع تصفه هلاهل
وانتَ حد الهم .. تلوج
ومحّد يسمعك هلاهل
تصفه روجه ويَ النهر
وتفيض تتفسّر هلاهل
تصفه لچمه وي الجرح
وتغيض ونسمعك هلاهل
والنواقيس وْيَ صوتك دگ جرسها..
وهزت أركان الكنايس
والهجر .. صوره عله حايط
شابحه الشوف وتعاين
والعشگ.. نجمه بضواك
تغيض وتمل وتعاين
يالبلچن ينكسر گلبك عليها
وينحر الشوف ويعاين
يلگه بيها طيوفه لحنّهن حچينه
يلگه بيها حروفه دوخهن بجينه
يلگه بيها شموعه تطفه..
وتعتلگ شمعه حزينه
ويبگه طيفك جيد مرهون بگلايد
لاچن أنتَ تظل جرح
ووشاح وطيور وقصايد
حملّك شاطينه غيض..
وحتى حبات الرمل بيدك تفز فزة طيور
وحتى جنح الصاف يلگاك بحريره..
وتصفه خيط وْيَ الطيور
وانتَ ذاك انتَ سؤال
تحيّر الدمعه عله چفك
وانتَ ذاك انتَ النحرت الگاع
حتى الدم يعرفك
لو نزف يشكيك وانتَ يفيض نزفك
طوح وْيَ الروح ونة الكاولي
وعيش عله عرفك
غني حزن الناس
وانتَ وْيَ الغنه نايين حزنك
سومري إيشانك،
غريبه الدنيه لو رادت تميل
سومري ..
سومري وبُعدك سماوين
وترف حزنك ثجيل
وْوادمك مثل الگمر
تضوي لمَن شمسك تميل
شلون حزن الدنيه من تبچي عليك؟
سالفه الدنيا تصير بحزنك انتَ
تخيّل الدنيا بغلاتك حدِّر بدمهه وتعال
حمّلك شاطينه غيض
وحتى جرف الماي اِلك عنده سؤال
يناشدك چفّينه خذهه
وهَيْنَه لو عفته جرايد
لاچن انتَ..
تظل جرح ووشاح وطيور وقصايد!