زيد - أبعاد التركي
هذا شهر والنور للعين مالاح
والليل في وسط الضماير مقره
القلب لايدله ولاهوب مرتاح
همٍ تثناله وهمٍ يجره
ليت المرض.. يا(زيد) يدفع بالارواح
والله لجي بينك وبين المضره
وليت الحزين اللي توقيه ماطاح
ساعة تذكر طيب وصلك (وبره)
(يازيد )وانت اللي لنا درع وسلاح
أيامنا من عقب فرقاك مرة
ياكن نجد فغيبتك قفر واشباح
والارض ودّعها الامل والمسرة
يامسندي ( ياخوى )دمع العزا باح
وانا على الدرب البعيد اتشره
قالوا عليك من المرض جهد وكفاح
وقالوا بخير وحالتك( مستقره)
وانا على قربك مواريدي شحاح
والفكر منى كل طاري يفره
والحزن له وقفة وتصوير والحاح
والهم ما غابت مساريه مرة
ياالله يافالق من الليل الاصباح
يامجري نجوم الفلك والمجره
يااللي بذكرك ضيقة النفس تنساح
ياعالمٍ بالغيب خيره وشره
تشفي عليلٍ ساقه البعد نزاح
البحر دونه والمسافات بره
عليه قلبي كل مافاض به ناح
والدمع له في زوية العين جره
وعليه وجد الحال مسرى ومرواح
وحشة فراق ولو عةٍ مستمرة
نرجيك يااللي رحمتك ساس الارباح
تكتب له من الخير دربٍ يمرة
تغنيه يارحمن عن كل جراح
انت الطبيب وعالمٍ مايسره
ويارب ثبتنا على درب الاصلاح
واغفر لزلات القلوب المغره
ويارب ترحمنا مصلين واصحاح
ونموت مافينا من الحقد ..ذره