خنتك - بشاير الشيباني

خنتك أي نعم أدري وخانت خطوتي دربك
وخانت عيني أهدابك وكل مابك شقى وأحزان

خنتك للأسف عيى زماني يصون لك حبك
وكلي علمٍ بحالك حزين وبالوهم غرقان

لأني ف يوم أنا مثلك حسبته وافيٍ قلبك
وخنت الحب أظن تذكر .. جرحت احساسي يا خوان

وجا وقتك تذوق المر عسى تتهنى في شربك
وحط بالِك ترى كاسي أمر منه أبد ما كان

تقول شلون خنتيني .. وكيف أغفر أنا ذنبك ..؟
حبيبي ريّح احساسك .. ذنوبي مالها غفران

أنا مت بقهر حبك بعد ما بان لي كذبك
بعد ما شفتك امعاها ومات بداخلي إنسان

رجعت وكل جنحاني كسيرة وضعت انا عقبك
وصارت دنيتي بلحظة كئيبة .. ما بها ألوان

ومر الماضي قدامي في لمحة .. مرني حبك
وصرت أبكي على قلبي .. ياليته لك أبد ما صان

وقلت أصبر واتحمل .. أجاري كذبك ولعبِك
مشيت وسكتِك ظلما .. وصرت أمشي بلا عنوان

وخنت إحساسي وخنتك جرحت بقوتي قلبك
عطيتك درس أبد ماظن يعيش بعالم النسيان

وشفت اليوم أنا دمعك سمعت ألحان من نحبك
وصرت أضحك على حبي .. عليك انت .. وعلى ما كان

بعد هذا انتهى دوري أنا ماعدت أبي قربك
كفايا بسبتك قلبي رمى اخلاصة وراه وخان