صدقت والا جعل عمرك ما صدقت !! - تركي الديحاني
لا قلتلك اغليك لا تسئل شلون
وانتا ولا عمرك تعنيت واشتقت
وارجع اقول اني متيّم ومفتون
في حضرتك وتقول تبطي ماصدقت
رفعت ظغطي من كلامك يامزيون
الظاهر اني في غرامك توهقت
صغير سن ونظرتك دون في دون
توّك جديد وبالهوى ماتعمقت
عظمك طري وتضيع بالشكل واللون
والا انا حبيت فبلك وفارقت
دايم تسمّع في وكالة يقولون
ماذقت من طعن الهوى ربع ماذقت
يعني احبك لازم اصير مجنون
واقولك غربت فيني وشرقت
واكلمك صبح ومسا بالتلفون
ولا غبتلك يومين مت وتضايقت
ترى حلاة الحب لاصار موزون
ماهو ضروري انسفه لا تعلقت
ياخي احبك بس لا تنشد شلون
صدقت والا جعل عمرك ماصدقت