فرصة سعيده - تركي الديحاني

على سما الخفاق برّاق ورعود
والقلب سال الشوق داخل وريده

وكل ماتهب الريح ويذعذع النود
جيتي في بالي يالهنوف العنيده

بمشاهدك كني مع العيد موعود
ياراس مال القلب واغلى رصيده

ومن دونك الدنيا تجي مابها فود
وتصبح حياتي كلها عالحديده

يافاتنه جيتك من ديار وحدود
واقول سبحانه محلّي عبيده

طول وشعر واحجاج ورموش وخدود
امواصفاتك يالكحيله فريده

والموت كله داخل عيونك السود
لا سلهمتلي قلت فرصه سعيده

انا دخليك صرت ماخوذ مجحود
وراع الهوى بعيون الاحباب صيده

اما قطفت التوت عنقود عنقود
والا تركت القلب برباط قيده

مضهود من سبة فعايلك مضهود
بس اتوجّد والتوجّد نقيده

من بيننا عشق ومواثيق وعهود
انا الاصل وانتي الهنوف الاكيده

ماجاب راسك لا سبندي ومقرود
محشومةٍ عن قول صيده جديده

ماجاب راسك غير تركي بن سعود
خلاك يابنت الاجاويد سيده

لو الغلا بالشلف اصبحت صاهود
واصلك واجيبك لو انك بعيده

على غلاتك عندي صكوك وشهود
وتشهد لك اشعاري قصيده قصيده

مبطي غلاتك داخل القلب موجود
سنين وانتي بالحنايا وحيده

محبتك يابنت الاجواد في زود
الحب لو ينقص غرامك يزيده

واليا ارتفع ارقى معه دايم سنود
وهيم واغنّي ابجوّك نشيده

وذا قربتك صارت سهود ومهود
وتشوش في راسي الجنون المريده

واخش هنا وهناك وهنيه واعود
وارجع واخش هناك واروح سيده

واقول ضميني على القلب ياجود
ايوه هنا ياجود ضمّي الوليده

اللي على شانك وطى كل نمرود
واحرق على شانك قلوبٍ عديده

تفداك من حبة حمنّي وعبّوود
اللي صورها دايمٍ بالجريده

سعديةٍ تمشى ورى درب مسعود
بليدةٍ الله رزقها بليده

وانتي سليلة مجد وانساب وجدود
في نظرتك شفت العلوم المجيده

تدرين دايم احرق نفوس وكبود
واحط حسّادي بجمر الوقيده

كل ماانادي ورفع الصوت ياجود
وقلتي هلا واهلين يغلى وليده