الترف الصغير - تركي الديحاني
الصاحب اللي يسكن القلب الكبير
اموت في طيشه على شطانته
لو خانت الاملاح بالبحر الغزير
جوراحي مهما حصل ماخانته
امشي انا وياه في نفس المسير
ديانتي مطابقه ديانته
جذاب وملكع ومملوح وصغير
مبطي وانا متحملٍ شطانته
يامر علي وكل مايامر يصير
انا رهن عينه وعيني صانته
اتحمله واتحمل الدرب العسير
كله يهون وماعدا ايهانته
يعني على شانه فقط نسل الوزير
يقسى ويشد الظهر في حصانته
مايدري اني من هل الفزعه مطير
اللي مكانتهم علت مكانته
مير البلا غالي وحبه غير غير
في داخل الخفاق سكر خانته
عامين متعبني وانا بالي قصير
متى يساعدني وشوف ايعانته
في زينه الجذاب ياعالم اسير
ولي الفخر لا صرت من سجانته
عينه ترد الروح وخدوده حرير
وشفايفه مثل مذاق الفانته
من شفت رمانه وانا ماني بخير
اصبحت مجنونه سبب رمانته
والشمس لاشافت جبينه تستخير
كنه معاها مطيحٍ ميانته
وفوق الحلا والملح والزين الوفير
تميزره عن الملا فطانته
لو قالو من حايل او انه من عسير
ماريّة العارض ونجد ادانته
اغليه مير الحظ ملعون وحقير
حظي واعرفه باخصٍ لعانته
كبّر علي الزين فالوقت الاخير
وصويحبي خوّن وخان امانته
كنت اتمنى وقتها اني ضرير
كرهت عيني من رأت خيانته
دام العشير يخون خفاق العشير
ياليت قلبي ايشال من مكانته