الشاعر الفاشل - تركي الديحاني

صبّحني الشعر يسعدلي صباحاته
والحزه اللي تجيب الشعر مسعدها

والشعر في ديني الثنتين راياته
مجّود القاف والفكره مجودها

من قبل مااحبكه احسب حساباته
اخاف لا اكتب قصيده واتنقدها

الشعر طب الجروح وكل اهاته
لا زادت جروح شرياني يضمدها

واليوم يازيد ماتغري كتاباته
ابعتذر والمشاعر لا تنشدها

من سبة الشاعر اللي من شعاراته
تقول هذا ملك ؟ والاخ مع يدها

جمهور فزعه معه ايردد ابياته
الله يخلي مصر فزعة صعايدها

اضحك ونفسي على المسحوب مواته
واجاهد النفس وارجع ثم اجاهدها

لوّه يشارك معي اكشف سخافاته
ماني بتركي يازيد ان ماتوسدها

لو كان فنان يستعرض مهاراته
انا على فن مهاراته امر وادها

انهيه حتى يسجل نهاياته
والكلمه اللي تجيله مايعاندها

ويتووه في وسط دوّامة متهاته
والناس ترقى على القمه وتصعدها

اما يغوص البحر ويجييب داناته
والا قصايده يسكت لا يعددها

والشعر ينخى وانا لبيت فزعاته
وودي كلمه على الساني ارددها

مدام يقصد علي ويكسر ابياته
ليته يكب القصيد ولايتعودها