عيد المملكة - حسن علي الهاجري

تزاحمت الأفكار وزين التماثيل
وقامت تجوّل في الضمير اجتوالي

لا والله الا زان جرّ المواويل
وطابت معانيها وزان المقالي

يا هاجسي لا تدّخر شي ذالليل
لا تحسبنّي لا زهمتك الْحالي

هات الخزاين كلّها والمحاصيل
واحلى المشاعر دام جاها مجالي

بازف أنا جزل الشعر والتباهيل
واسوق للغالين ما كان غالي

وأخص ابو متعب طبيب المعاليل
بلسم جروح اللي دناه الزوالي

عبدالله آل سعود غيث المقاليل
نسل المليك اللي لنا راس مالي

يستاهل التمجيد تاج الحلاحيل
لأنّه سليل المجد تاج الرجالي

طبّق حدود الله ولا يقبل الميل
وامّن بلاده في جنوب وشمالي

وامره صدر أن لا انحاء وتقبيل
امر يدل أنّه حكيم ومثالي

ومن عز راسه دلّل الشّعب تدليل
ومن يزهمه يلقى نعيم وظِلالي

تنبت تحت ماطاه ورد واكاليل
وثوب التواضع كاسيه باعتدالي

صارت فعاله للنّشاما قناديل
واسمه شهر بالطيب ريف الهزالي

حرّ عزيز ٍذلّل الصّعب تذليل
تنشر له البيضاء بروس الجبالي

مجلسه منصى للرجال المشاكيل
يفداه من بيته من الضيف خالي

مدهال صبح وليل يجلى المعاضيل
لبعيد والا للقريب الموالي

ذولا مدابير وذولا مقابيل
تارد لها عد شرابه زلالي

الضيف مقلاطه على مفطح الحيل
وسمن على ظهر السمينه يسالي

والعود الازرق واشقر البن والهيل
وفنجال من ذاقه من الهم سالي

ومن طيب راسه عانق الجدي وسهيل
يوم البشر ما بين طامن وعالي

يشهد له التاريخ جيل باثر جيل
من زود طيبه صار مضرب مثالي

له في قلوب الناس حبّ وتبجيل
وسجّل له التاريخ صدق المقالي

تم الكلام ولا حويت التفاصيل
في اللي تعلا فوق عرش المعالي

وامجمل ما يبغي اليوم تجميل
جمايله اجمل وصوف الجمالي

واقولها صادق ولاهوب اقاويل
الله يجيره من صدوف الليالي

والله يجيره من جميع التهاويل
ويكفيه شر أهل الفتن والضَلالي

ويالله عسى دربه سعاده وتسهيل
آمين يسمعني عزيز الجلالي

وفي العيد زفيّت الشعر والتباهيل
وللملكه حب وفا اول وتالي

وصلاة ربّي عد وبل المخاييل
واعداد ما بان القمر والهلالي

وعد الزهر واعداد ما شعشع سهيل
على رسول الله حميد الخصالي