العلم نور - حسن علي الهاجري

الشعر له رسم ومعايير وفنون
ما يسبر اغواره حد غير ناسه

ماهوب لعبه بيد خبل ومجنون
ألهام من ربي ولاهو دراسه

مرّ يجي صعب وعباله ومشطون
ومرّ تزيّن لك بدرّه وماسه

واليوم يومه لا تقل كيف واشلون
شيء طرالي والشعر فاض كاسه

أحس في وسط الحشا جرح وطعون
من كثر من يشكي الزمن وانتكاسه

وهذي عوايدنا لها عدّة قرون
ننعي الزمان ونتهمه بالخساسه

والعيب فينا واكثر الناس يدرون
لو ان بعضنا غارق في نعاسه

نفتربالدّنيا بليا دركسون
واحلامنا مال ومناصب رياسه

ومنها غرق فرعون واصحاب فرعون
ولا فادهم منصب وجاه وحراسه

واجب على الانسان ما يتبع الهون
ويروح عمره بين لعب ووناسه

العلم نور ويهدم الجهل بالكون
وكلّ على قدّه يفصل لباسه

أحد عليه اللبس زاهي ومصيون
وأحد فلا يستره حتى مقاسه

وقد قالها قبلي من الناس مليون
منهو غرس غرس بيجني غراسه

وترى التعلم خير ياللي تعذلون
ومن يبغي العليا يقوي أساسه

والعلم أجره يا هل العرف مضمون
قاله رسول طهر الله انفاسه

ماهوب قول من وكالة يقولون
وماهوب كذبة مدّعين السّياسه

لكن كلام الصدق فاللي يجدّون
فعلم الفضيله لا علوم الدناسه

بان النمل والحوت لأجله يصلون
وملائكة ربي تسهل مداسه

ويا طالب للعلم للعلم قانون
يبغي فطانه وانتباه وكياسه

واليا رماك ابليس في سهم مسنون
وخيم على قلبك وعطل حواسه

اقرأ كتاب الله ليا صرت مغبون
يجلي هموم القلب .. يبعد عماسه

وجنب عن اللي للمهالك يجروّن
وجنب عن اللي عيشته باللحاسه

وقت اللوازم كلهم ما يسدون
ورصيدهم بالطيب بين افلاسه

مفتون قابل له من الناس مفتون
لا عندهم همه ولا به حماسه

وبعض العرب لو كان له رمش وعيون
اعمى البصيره ما يدّله احساسه

سفيه راي كل يوم على لون
صافي زلال الجم لا جاه حاسه

ولا خير في اللي يتبع الذل والهون
واللي ينزّل في المهمّات راسه

وختم الكلام العلم بالدّين مقرون
وبالعلم ميزنا الذهب من نحاسه