غالي وسيّر - حسن علي الهاجري
((.. الصوت .. )) من الشاعر المبدع / بدر مفرح الظمني
يا بو علي ليت لي جنحان
واطير لدبي طوّالي
ادخل حماها بلا استئذان
اجيك منصلّ من عالي
واشوف عفرية الغزلان
اللي طوى حبها حالي
من عقبها خاطري عمسان
والنوم ما عاد يحلالي
اربع ليالي وأنا سهران
اطيوفها بس تبرالي
أحس في خافقي بركان
الشوق يصليه بالصالي
بعيونها رحلة النسيان
لا سلهمت موتي اشوالي
ويغار من ثغرها الرمّان
والمرمر يقول عزالي
والعود وش عودها ريّان
والخصر بالمشي ميالي
بنتن لها بالحشى نيشان
اقول بعطيك من تالي
حتى الهواتف بعد خلاّن
جوالها عشقِ جوّالي
جتك الرساله مَعَ القيفان
مضمونها يا بري حالي
((.. الصدى / من حسن بن علي الهاجري ..))
حييت يا شاعر المطران
يا مبدعن زين الأمثالي
غنيت لك باعذب الألحان
غالي وسير على غالي
لا باس يا شاكي الهجران
جرح المواليف غربالي
قبلك شكى نمر ابن عدوان
وغنى بمسحوب وهلالي
وراع الهوى دايم بلشان
يسهر الى المذن التالي
لا هو بسالي ولا طربان
يلاحي الورق ويلالي
ويا بدر كان الخطر بك بان
احجز على دبي فالحالي
من فوق ما تدني الأوطان
ما صمموها على الخالي
بوينق من صنع الامريكان
تدوي تقل دوي زلزالي
وانا خويك بها يا فلان
افديك بالحال والمالي
وتزور مدموجة السّيقان
ريمية ريقها حالي
مياسة القد لامن لان
يسبى العشاشيق لا مالي
وتروي ضما قلبك العطشان
ويحييه من عقب الامحالي
والهم يقفي مَعَ الاحزان
وترتاح يا طيّب الفالي