وزير التجاره الكويتي - حسن علي الهاجري

تعيش ياللي تستحق الوزاره
يا فخرنا اللي بالمرديان لقيناه

فلاح ابن ذروه وزير التجاره
ابو فهد وقت الشدايد ذخرناه

بالشام كنه ساكن وسط داره
ارسل علينا راعي الطيّب شرواه

عبدالله العلوش رجل النعاره
وسلم علينا عقبها بلغ وصاه

وصاة منهو ما يحسب الخساره
أنه يبينا فالمرديان وجيناه

ولزّم علينا صادق في حراره
لا ما تراخى جعل الانذال تفداه

وصرنا عن يْمينه وصرنا يساره
بالدّيره اللي جوّها غير ويّاه

نجلس مَعَ كبار البلد والسّفاره
يفخر بنا لو كان من كان بحذاه

عينه علينا بين تاره وتاره
وإليا تأخرنا بقلبه محاتاه

ويرتاح لا جينا وبوجهه بأشاره
ويكثر الترحاب من طيب مجناه

ونركب مع الموكب معه بالصداره
ويعدّنا والله من اقرب دناياه

وما ضاق في ليله ولا في نهاره
وما غرّّه المنصب ولا غرّه الجاه

ولأجله جزيل القاف نحكم مساره
ونجيد في لعبه وبدعه ومعناه

وشروى فلاح القرم تافي شباره
وتتعب قواميس اللغه لا مدحناه

وافي لأجل الشعب صادق قراره
سعد الرفيق اللي زمانه تحدّاه

والمرجله والطيب والله شعاره
مفتوح بابه والمشاكيل تنصاه

امكرّم الضيفان عزّ لِجاره
لين مَعَ ربعه وصعب على عداه

حكيم راي للعوارف مناره
عقله رزين ويحسب خطاه وحكاه

صافي السّريره ممتلي بالطهاره
كريم مثل المزن لا من نثر ماه

وعنده على ذب الخرايم جساره
ولا يلتفت لأهل الرّدى والمحاباه

نفسه عزيزه كامل في وقاره
ولو جيت اعدّد ما تعدّد مزاياه

والهاجري دايم يفوز بجداره
بالطيب يوم أنه على الطيب مرباه

يالله عسى درب السّعد في جواره
ويبقى ذخرنا بوفهد لا عدمناه

وماقلتها محتاج والاّ عياره
لكن كفو للمدح والمدح يزهاه

وفلاح ابن ذروه وزير التجاره
جعل البلاوي والمنايا تعدّاه