أسعد اللحظات لكن .. - حسن علي الهاجري
في قدوم الشيخ جابر عيّدت كل الكويت
يا هلا يا مرحبا بالشيخ جابر في بلاده
واثني التّرحيب للّي يوم نوّرنا بكيت
الإمير العادل اللّي ما يبي منّا شهاده
انهمر دمع القصأيد لين من دمعي رويت
وصغت عذبات المشاعر للي يِبْكينا بعاده
لو بعبّر عن شعور القلب ما ظنّي وفيت
جابر أكبر من بيوت الشعر لو بجمع حصاده
في غياب الشيخ حزن الكون في قلبي شكيت
وفي حضوره صارت الدنيا مسرّات وسعاده
الفرح في كل حي وكل شارع كل بيت
اقبل النور بحضوره والحزن قفّى سواده
البيارق شامخه يا شيخ يومنّك لفيت
وأنْشَد الكل بحضورك يا عسى عمرك زياده
ألف حمد وألف شكرالْخالقي يومك شفيت
يا أمير قلوبا يا فخرنا رمز القياده
بالعدل والدين والإحسان حكمك ما طغيت
التطوّر في بلادك والحضاره والرياده
التواضع والفضيله والأمانه ما زريت
من خصالك كلّها وصدق العزيمه والإراده
في صروح المجد يا رمز الوفا طلت وعليت
وغصب يشهد لك عدوّك بالسياسه والعباده
كم فقير من صدوف الوقت من جودك عطيت
وكم مريض بيدك البيضاء تداويه بضماده
كم يتيم صرت له والد وعنّه ما سليت
جابر العثرات رمز الجود كاسينا وداده
وأنت في هم المرض للجار عزّيت ونعيت
وأمرك السامي صدرته من جنيف اعلن حداده
ما نسيت الفضل لأهل الفضل والله ما نسيت
يا عريب الساس يا فخر الكويت ويا عماده
شيخنا وقت اللوازم لو بوصّف ما كفيت
شيخنا وقت المعارك مثل حرّ في هداده
حاوي كل الصّفات الطيّبه محمود صيت
مالك زمام المكارم والأدب شربه وزاده
الله ايديمك لنا في عافيه لأهل الكويت
والله يعينك على الشّدات بالصبر وجلاده
يا عظيم الشان أنت الواحد اللي بك دعيت
أنك تبارك في ابونا وأنك اتحقق مراده
هذي ابياتي من اعماقي لأبومبارك هديت
الأمير العادل اللّي ما يبي منّا شهاده