مجنونك - حمد السعيد
تزعل واراضيك واتلذذ بتزعيلك
تبي الصراحه انا مجنون زعلاتك
لا قمت تبعد وأنا اقرب وادنيلك
وامسك طرف غترتي وامش دمعاتك
وتبدي تعاتب وأنا كل انتباهي لك
ما اسمعك شتقول أنا عيني على شفاتك
وتعيد حجيك وتفرك حيل منديلك
وتخالطت صادق حروفك بوناتك
وأحاول أرضيك ومدري منين ابديلك
واحتار وأذكرك في بعض زلاتك
واسمعك ماكتبته بك واغنيلك
طاروقك اللي تحبه واكسر سكاتك
واستسمحك واعذرك واسمعك واشكيلك
واتلهف لبسمتك ورد ضحكاتك
يسرقني الوقت ولا يمديني احجيلك
كلام اللي تحفظته لشوفاتك
وقت الوعد فات وعيوني تراعيلك
وقفيت واشغلت القلب بلتفاتك
عيني على خطوتك والقلب يدعيلك
الله يحفظك من الحاسد وشماتك
تزعل واراضيك واتلذذ بتزعيلك
تبي الصراحه انا اعشق كل حالاتك