رجل المواقف - حمد السعيد
يا دار نورك غاب مع راعي الدار
يا لله عسى ما يبطي النور غايب
عساه يرجع مع سلامات الاسفار
كن الزمن من عقب فرقاه عايب
يا لله يا منجي هل الكهف والغار
يا عالمٍ باسرار دنيا العجايب
يالله وأنت اقرب لعبدك بالاسحار
تفرج لشيخ طايع أمرك وتايب
غلاه وسط قلوبنا كبار وصغار
متوارثين الحب ما هي غصايب
حنّا نحبه عشق بالطيب واحرار
وغيره يحبّونه على غير طايب
لا ما نجامل في غلا الوالد البار
شف ورعنا يبكي ويبكيه شايب
كل تحرى عنه علوم واخبار
لا قيل طيب يصبح الشعب طايب
يومه طلع مع كلمته شوف وش صار
كنا ندور للسعادة .. سبايب
قمنا نتباشر فيه هو كحل الانظار
اجر وعوافي يا عطيب الضرايب
شف صورته بقلوبنا رمز وشعار
نغليه ونفديه روح وقرايب
لو بالمرض تجيير ما هو بمحتار
كم واحدٍ دون المرض عنه تايب
الشعب عايش كربته سر وجهار
شعب يحبّه حب ما هو بهايب
حبّه نبت بقلوبنا مثل الازهار
واللي يحاول قطف الازهار خايب
وشلون ما نغليه تفداه الاعمار
وعمره غلا للدار سلم وحرايب
يا ما تحمل لاجل هالارض الاخطار
تفجير واكبر منه غزو وطلايب
مصايب دارت على راسه كبار
أحداث مرت تودع القلب ذايب
من دبرته شف رغم الاخطار إعمار
رجل المواقف بالرخا والنوايب
هي بس للتذكير وان عميت ابصار
داره عمار ودار غيره خرايب
ويا ما جمعنا رغم وجهات الانظار
على الوفا وشعوب غيره كتايب
يوم ان غيره شغلته رفع الاسعار
شيخٍ علينا ما فرح بالضرايب
ويوم ان غيره بين ظالم وجبار
جابر يدارينا مدارا حبايب
بالطيب والرحمه وعطفه بالاقطار
ما دار مثله والمواقف حسايب
هو سورنا الأول إذا عدّن اسوار
هو عزنا وان كان صارت نشايب
هو شبرنا الطايل إذا طالت اشبار
هو درعنا هو سترنا بالصعايب
هو شورنا وان كان ضاعن الاشوار
هو راينا ومن كان له رأي صايب
هو شيخنا وادري توافيق واقدار
هو وهبة من عند راعي الوهايب
هو ظلنا وإن شحت الظل الاشجار
هو بردنا في وجه حر اللهايب
هو غيثنا وان شحت المزن الامطار
هو شمسنا وان زاد ظلم السحايب
هو نورنا وان شحت النور الاقمار
يالله عسى ما يبطي النور غايب