رسالة - حمد سعد المسرع

كل الذي بيني وبينك رساله
ارسلتها لك بالغلط وانت دقيت

وش لك بتطويل الحكي والعباله
عيّيت تسّمع كلمتي ماترويت

مدري تطفّل موقفك او جهاله
واللي ذبحني يومك تقول حبيت

مسرع عشقت الحب عندك سهاله
حبيتني في ربع ساعه ومليت

انا اشهد انك صرت للروح عاله
ياليتني بزود الخطا ماتماديت

الحب عقب ( ؟؟؟ ) قافل مجاله
هذي الحقيقه قلتها لو تعزويت

الصاحب اللي ذقت احلى دلاله
من دلّته ياما وياما تقهويت

له منزل في وسط روحي لحاله
وفي كل شبر داخلي صار له بيت

الحب مايحلى بليّا وصاله
اللي بعاده شتّت الفكر تشتيت

يجوز لي في ضحّكته وانفعاله
ويطري على بالي بكل التواقيت

البحر يسألني ويصفق بجاله
يقول وينه ياحمد ذايع الصيت ؟

اللي سحرني في بهاه وجماله
اللي ليا وقّف على جالي امسيت

هذا البحر يشكي حلاه ودلاله
وشلون انا لو جيت اباأوصف ولا اوفيت ؟

ودام اللذي بيني وبينك رساله
ارسلتها لك بالغلط وانت دقيت

ارجوك روح وخل قلبي بحاله
واترك لي هموم الزمن والتناهيت