في زمانٍ تردى - حمد سعد المسرع
في زمان ٍ تردى قمت ادوّر خوي
قمت ادوّر حجاج ٍ لا زهمته نهض
في طريق ٍ طويل وصاير ٍ ملتوي
لو مشيته تعبت وماقضيت الغرض
كل شبر ٍ بدربه فيه ذيب يعوي
مادريت اش علامه جوع والا مرض ؟
ليتني ادري عقول الناس وش تحتوي ؟
من لقيت وسألته صد والا امتعض
ويش فرق السّوي واللي مهوب بسوي ؟
ادري الفرق واضح مايساوي بعض
قلب ياللي بصدري سامع ٍ له دوي
والسبب ماهو برمش ٍ ولاهو لحظ
يوم ماطاعني وقتي سريت جلوي
يوم وقت الصداقه والصديق انقرض
بين عمر ٍ مشابي وبين ليل سروي
جبت د لـّـة همومي فوق جمر القرض
العمر طاحت اوراقه وقام يهوي
والخطا صار عادي والنفاق انفرض
شجّرة الوادي اللي عودها مرتوي
ذكرتني بريم ٍ في الطريق اعترض
ذكرتني بخلّي يومني مهتوي
يومني كنت مادوّر بداله عوض
اول الحب تأثيره بروحي قوي
وآخر الحب قلبي ياعرب مااتعض
وغير هذا غدا جسم العنا منطوي
ذا جزا من وفا بعّهوده وما نقض
ومن مشى في طريق ٍ ماهو بمستوي
أشبه بعسكري ٍ للأوامر رفض