لا توصي حريص - حمد سعد المسرع

كان قصدك عذابي لا توصي حريص
الزمن ما يقصر وانت فيك البركة

لا تعاند تراني صرت مثل القريص
ما حد راح صوبه والعذاب انهكه

لمعة الشوق فيني مثل لمع الفصيص
والقدم سقتها لك والطريق اسلكه

قانصي لك وطحت برمش عينك قنيص
يوم شفته عذابا القلب صوت ادبكه

جيت بأمر منك واثر مالي محيص
اثر سهمك تعدا للحشا وانهكه

اشهد انك بقدرك وبغلائك بخيص
من كثر زود حبك طحت وسط اشبكه

انت وينك؟ ترا الدعوا غدت خيص بيص
وين راح الذكا والفكر والتكتكة؟

خل قلبي يحبك يا غناتي يهيص
وبين روحي وروحك وقف المعركة

ما هو شرط من دش البحر صار غيص
كم وكم واحدًي شاف البحر واربكه

اشتوت كبدي وصارت ابعدك حميص
وقرقعة قلبي بصدري تقول اتيكة

الامل انطفأ نوره وباقي بصيص
والعمر فات دوره والزمان ادركه

صح قلت ابتعد لا شك منت برخيص
ما تناساك عقلي دام فيه احركه

ما يأثر عذول صاعيونه نغيص
راح مني وكفه يا القهر بعركه

يا حبيتي جعلني من غلاته خبيص
له عيوني وطن والروح له مملكة

ما علي غير شوفك يا حياتي نقيص
هاك خيط المحبة وبيديك امسكه

بين هم وتفكير وخطي عويص
كل من قال خله قلت كيف اتركه؟

كيف أخلّي حبيب في المحبة خليص؟
فارضي احترامه والحنان املكه

لو جعل لي رسالة وسط مخبا القميص
بدري ان التجافي والزعل فبركة

ويوم قلت ابتعد والله منت برخيص
كيف يرخص مقام اللي هواه احبكه