قصيدة مستورة - حمد سعد المسرع

الفتون اللّي هواها ماخذن له حيّز
وسط قلبن مايعرف الا هوا مستوره

ليه مايصبح هواها فارق ومتميّز
وهي بعيني دايمن تطلع بأجمل صوره

أحمل بصدري لها حب وبعد متحيّز
للجمال اللّي خذاني في غزير بحوره

ياغزالن من حلاها ماقدرت أميّز
تايهن والعين من زين الغضي معذوره

جعل يسقا لا دخل سبعه ورحت أفيّز
نلتقي بالديره اللّي بصيفها ممطوره

العزيز بوسط قلبي مايصير عزيّز
دامه بقلبي عزيزين ماتطيح قصوره