نامت بحسرتها - حمد سعد المسرع
نامت بحسرتها وانا نمت مرتاح
علمتها وشلون معنى التحدّي
عيّشتها مابين الآم وجراح
قامت تعرف ان ماهي اللحين قدي
صارت بديني لعبتن مثل مسباح
عذبتها مابين هجري وصدي
خليت كحلتها من العين تنساح
وصار الفكر والحس والروح عندي
مر أسهّرها الا وقت الاصباح
ومر أمسّيها على حلم وردي
شوقي سرا بعروقها وقام يجتاح
حتى الغلا بعيونها صار فردي
صرت بحياة المترفه ريح فوّاح
بنت الدلع والذوق بنت الأفندي
بنت الحياه الهانيه حظها طاح
تلعثمت ماتدري منين تبدي
انقلبت الآيه وراح الدلع راح
واللي ابيه يصير لا مايردي
خليتها عقب الطرب والتمداح
تشقا بحب اللي فعوله تعدي
علمتها ان السجن تهذيب واصلاح
وعلمتها ان البحر جزرن ومدي
وعلمتها ان دموعها ماهي سلاح
مهما تهل الدمع ماقلت هدي
ياصاحبي زرق الهوا كنه إرماح
بيّحت سدّك وانت بيّحت سدّي
لو كل من له طير سماه سداح
ماشفت جولن للحباري يعدي
أول بديها كان قفلن ومفتاح
واليوم صار الوضع حازم وجدي
جننتها نسّيتها طعم الافراح
بنت الدلع والذوق بنت الأفندي