في وزير التجارة - حمد سعد المسرع
قصيدة في وزير التجارة السابق المهندس : فلاح بن ذروه الهاجري وبسبب هذه القصيده أصبح الشاعر حمد المسرع
رئيس قسم في وزارة التجارة والصناعة :
قبل ماتصبح وزير التجاره يافلاح
وانت قرم وسمعتك بالمراجل فارقه
أشهد انها كلمة الحق مافيها مزاح
كل ماجا طاري الطيب جيت تسابقه
انت تستاهل مع البشت والمنصب وشاح
هو يجيك يعانقك قبل لنت تعانقه
تفتخر فيك المناصب من علوم النجاح
وصيتك بكبد السما لاح صوبي بارقه
مجلسك بالعود الازرق وريح الهيل فاح
الدلال الصفر والعود جمرك حارقه
مجد واخلاق وتواضع وفزعات وسماح
وعادني بازيد وحده فعولك صادقه
خوّة الطيّب مع الطيب مثل اسم الصباح
رزقه ونسّمة عليله تجي مترافقه
حلفنا يابوفهد من على وقت الرماح
حلف ياوجه إمّحلف من عصور سابقه
جيتك ابغا اشرب من العد ورّدني قراح
السفينه طال عمرك تراها عالقه
ماشكيت من العذارى ولا ظبي البراح
اشتكي نار بوسط الظماير حارقه
ودي اطلع منك والصدر ماليه انشراح
همي اللي طاول الصدر ليت افارقه
الزمن يمضي وماراح من الاعمار راح
حاجتي عندك وابي منك بس موافقه
انصف اللي جاره الوقت وسنينه شحاح
ينتضر شمس تنوّر بدربه شارقه
يابن ذروه وانت راعي المراجل والكفاح
خل من شيّد لك الشعر يهنا خافقه
وجعل طيرن مايسميه راعيّه فلاح
جعل يصبح في عداد الطيور النافقه