معاديل الرجال - سعد برّاك
العرف مايعرض على ناس عرّاف
وكلٍ يميز كلمته لانطقها
والشمس لابانت علي كل مشراف
محدٍ قدر بيديه يحجب غسقها
وأعلا معاديل الرياجيل الأنصاف
واللي طرق باب المراجل طرقها
وترى الرجال أشكال وأزوال وأصناف
سبحان من يفنى النفوس وخلقها
أهل المواقف كل ما حان ميقاف
امن الفخر والفعل ينضح عرقها
رجلٍ علي العليا مكانه وينشاف
خلد هروجه فالفعول أوثقها
للعقد حلالٍ وللصعب عساف
عسف المراجل والصعايب عشقها
أليا فزع بالفعل يسعى ويطاف
واليا وعد تم الوعود وصدقها
على خطايا صاحبه ستر وألحاف
يدمح وغرات العرب ما درقها
للطيب مرباعٍ وللعز مصياف
وللجود ركن وكم رقابٍ عتقها
وأحدٍ علي الهرجه سريعٍ ومزهاف
أما يصر العين وألا بلقها
أليا وقف ياقف علي حد مهياف
طيبه لياشاف الجماعه فرقها
ماعنده الا الثرثره والتحساف
لو الرجوله سلعةٍ له محقها
خسران مفلس في مراحه والأنكاف
وأهل الحمق دمارها من حمقها
من أمس معنى القاف يضرس علي القاف
كنه يقول أرقى الطويله ووقها
ليلي سهرته كن في راسي أشعاف
والقلب لو داحم ضلوعي فرقها
ياهوه ماهى قصة احلاف وأحلاف
ولاهيب لحية دوك خذها وذقها
مانيب في شذب العراقيب صراف
وأذنى عن اهروج الحواقيد صقها
شريف مرضى غير في خوّة أشراف
مثل المزون وبرقها لاشعقها
الراس وش خانته من غير الأكتاف؟
واللي يكرم لحيته ما حلقها
لو قلت طاف الهرج ياهوه ماطاف
الا وقع وسط السموع وصعقها
وأن قلت هذه حذفةٍ دون حذاف
محدٍ يحس بشرقةٍ ماشرقها
دربٍ يحد النفس للضيق ينعاف
يم السعه يا قلب الأقدام سقها
بنادقٍ ترمى وتخطى بالأهداف
خطرٍ على رمايها من فشقها
وادي هل الصفصاف مافيه صفصاف
حتي الشجارى فيه ميت ورقها
والفرقه اللي شرها يهرف أهراف
ياعل دورات الزمن تصطفقها
ومنيف ماغره سوى راى نواف
اغواه حتى أن المعالي زهقها
واللي يحوفه من بلا الوقت حواف
اليا بغى يهرج هروجه شهقها
واللي يبهر دلته عشرة أضعاف
أكيد لامنه طبخها حرقها
والخزنه اللي وسطها در وأصداف
اللي خذا منها العطايا سرقها
ياخشم ياللي من سنه ترعف أرعاف
إن كان تقدر حوقة الوقت حقها
لو البحر ينقص من أسباب غراف
محدٍ شكى غدر البحور وغرقها
والجسم لو يشكى طرف تشكى أطراف
واللي يبيت طعمته يغتبقها
أسنين بقعا بين جزلات وعجاف
واللي يسابق سرعها ماسبقها
الوقت عبره والتجاريب محراف
من لااعتبر مطالبه مالحقها
هذا وأنا ماغر عن درب الأعراف
واللي يقدم كلمته مافهقها