غزيّل الماء - سعد برّاك

شرايد الفكر والشعر وعواميده
وركايز ارقى بيوت الشعر وأجزلها

من يعرف الشعر ما يجهل قواصيده
ومن يجهل الشعر ميزاته تجاهلها

ياهاجسي عن بلا الهزل ومناقيده
طاول شواميخه العذباات وازهلها

اما علي الشامخه نقطف عناقيده
وألا بلاش أبدع الكلمة من أولها

يالله بوجهك من الوقت وحواسيده
تمم لي الطرقة الزينه وسهلها

الوادي اللي عجاريده عجاريده
ممشي دروبه ماهو لازم نكملها

سهله وعر والجبال اكبر شواهيده
والجثه الميته مجهول قاتلها ؟

أجوف تدب العقارب في ذرا حيده
ميدان حرب وبسوسه يامهلهلها !

مات ابن فرهيد وعتاشت فراهيده
هذاك حط العلوم وذاك شايلها

طبع القراده يعوّد في مقاريده
واهل الجمايل جمايلها تجملها

تحاضب الوقت وأقتربت مواعيده
من يوم شفنا الخنا تمدح فعايلها

سندت واسناد قولي من مواكيده
حقايق القول توخذ من مناهلها

وغزيّل الماء علي البير ومواريده
سراب وعيون ورد البير تكحلها

والبتر والشتر والهرج ومراديده
والنيّره اللي مولعةٍ فتايلها

وقصص ابو زيد والربد وروابيده
وبروق صيفٍ مخايلها يخايلها

وخلف الكواليس والهيل وبغاديده
والمضحك امن النفوس ومن عمايلها

والجيش والخيل والحرب وبواريده
وحبال مابين ناقضها وفاتلها

هذا قصيد المعاني يا قواصيده
واللي بعيد النظر يقدر يحللها