بوح - سعد برّاك
اموتك وأعيشك بالحنايا حنين وبوح
وآلاقيك بادن فالتفاصيل وأنفاسي
أحسّك عديل الروح مدرى بجسمي روح
بعيني بقلبي فالشرايين وإحساسي
أنا أحتاج ضحكك طيبتك صوتك المبحوح
إلك بحةٍ منها يوقف شعر راسي
عليك الأمان وكل طيشك معي مسموح
أعذرك وأسامح وانت بالحب يا قاسي
تصدق حبيبي لك بوسط الفؤاد صروح
بناها الولع والشوق واحساسها ساسي
بعد كل هذا وين رايح وليه تروح
فراقك وصدك سبة الهم واتعاسي
لاتستعذب الهجران ما بالجفا مصلوح
وباب الوصل مفتوح يالداله الناسي
ومهما تغيب يظل باب الوصل مفتوح
وثابت على وصلك كما الشامخ الراسي
لو إن الزمن يجري وصدر اللقا مجروح
وأخاف الاماني تنتحر في فضا ياسي
اببقا على عهد الوفا والقصايد بوح
وأسجلك في شعري وأحفظك بكراسي