التجربة قاموس والشعر قاموس - سعد برّاك
يدق في بالي من البعد هاجوس
واجر صوتي بالقوافي وأغنيّ
لو إنها بالروس ومصادم الروس
ضحكة حجاجي قبل ضحكات سنّي
يا خوى لابسني من الحزن ملبوس
كنه تلبسني تلبّاس جنّي
رجلٍ من صدوف المقادير محسوس
مانيب مع جور الزمان متهنّي
احبس بصدري هم والدمع محبوس
وارجي من الله صبر والعزم منّي
التجربة قاموس والشعر قاموس
واللي يبيني ياخذ العلم عنّي
ماتوخذ الدنيا علاقات وفلوس
لو إن نجر اهل المصالح يدنّي
بكره يبيّن كل ما كان مدسوس
وانا علي نهجي وظنّي وفنّي
الله يثيب نفوس ويعاقب انفوس
تغير انفوس العرب ماشحنّي
اما الظفر ياباري الروح والقوس
والا الممات ولا حياة التمنّي