عساك بخير - سعد برّاك

مراقيب الشواهيق الطوالي
وذعذاع الجنوبي والشمالي

ودرب البعد وانتي والقصايد
وهوجاس القلوب اول وتالي

سلام الله علي الحب وسنينه
وسلام الله علي دور الليالي

ذكرتك ! وتضح معني الحقيقة
غلا وانا احسب إنك منت غالي

عساك أبخير ؟ جعل الخير فالك
وعسا وجه السعد فالك وفالي

فقدتك ! وأكتشفت اني احبك
وضيّعتك ؟ وهذا من هبالي

رحلت وراحت الدنيا مآسي
جرالي من غيابك ماجرالي

لك الله من رحلت وغبت عنّي
وانا حزني عليك يهد حالي

خسرتك وأعترف بإني خسرتك
سبب طيش التصرف والتعالي

مصيبة وآه ياكبر المصيبة
ليا منك فقدت أنسان غالي