صوتك للغلا نبرة - سعد برّاك

من لاعتبرنى ليامن جيت ما اعتبره
هاذي طبوعي وهاذي كلمة الساني

جربت فالوقت لين اخذت لى خبره
من دور عوج السنين اللي تحداني

انا ليا زاد هم القلب من كبره
اطلقت للريح خفاقي وجنحاني

مؤمن وضيق الجوارح قاطعٍ دبره
عاقل وكن السعه بيتي وريضاني

دورات بقعا وصكات الزمن عبره
والدايم الله وعمر الادمي فاني

تبى تعرف الفتي فالشدّه اختبره
لاجات شداتها يظهر بليهاني

يذرع معك فالقسا ويمد لك شبره
ويقول عدوان من رافقت عدواني

وإلاّ الردى فالشدايد يفتقد صبره
يقصر عن الطايله ويموت خسراني

الذل بيته وقل المرجله قبره
يرقص علي شاربه تسعين شيطاني

اهل الردى والجحود ابخوت منثبره
واهل الكرم والوفاء للطيب عنواني

وين انت ياللي بصوتك للغلا نبره
عقبك تغداني الوجد وتعشاني

اشعب ذلول الطواري واكتم العبره
اخاف لا أعيون حسادي تقرّاني

كسر الخواطر بهجرك واللقاء جبره
تعال وأجبر بوصلك كسر هجراني

اسرع ترى الجرح جرحك فالحشا وأبره
عالج جروحك ودورّني وتلقاني

وان كان مافاد فيك الشعر مع حبره
ريّح ضميرك ولا تتعب علي شاني