يموت الحب - شافي السبيعي
معاك الحق وبكيفك ولا انت بعشرتي مجبور
وأنا من صوبي سامحلك نعم ومبرّي الذمّه
وتأكد واللّي يجمعنا انا لا قلت لك معذور
مجرد واقعي يحلم يعيش بواقع يهمه!!
على النيّه أنا عايش على الدّنيا بطيب شعور
أعيش وصدمتي أصعب خيانه تصدم الأمه!!
عليك الّلّه ياذاك الشعور البارد المهجور
هدمت أغلى طموحاتي وقتلت الحلم من يمّه
وهدمت بقلبك القاسي سنيني و لا تركت سطور
ومشاعر قلبك اللاّهي انا ادري ماهي مهتمّه
أحسبك يالوفا بتجبر حطام الخاطر المكسور
ولقيتك للأسف مثل الأوادم شرّك تعمّه
وشالّلّي يفرق الجاحد؟عن اللّي خان؟وعاش الدّور؟
أذا ماكان هذا هو اخو لهذا..ولد عمّه
غريبه يالقلوب اللي تحاول تخفي المستور؟
تخاف تكون بالصوره وتكشف واقع تضمه؟؟
واذاانت بخاطرك كلمه أو ببالك سؤال يدور؟؟
أبد لا يشغلك قلبٍِ عشانك مات في همّه!
مادام أن الوفا بين الحبايب ماخذا له دور
يموت الحب..لعيون الفراق الّلّي هدر دمّه!