إن كان هو مثلي - صقر النصافي

ياطير ياللي بالسما تكسر الحوم
ماشفتلي حول المعدني فريجي

فريج من يزها الخلاخيل وارقوم
اللي عليه القلب غادن حريجي

امس الضحى والبارحة وأول اليوم
شي لجا بي لا لجا للصديجي

اونست في قلبي كما لجه البوم
ثلاث مرات وأنا أشرق بريجي

لواهني اللي الى ضاق له يوم
اليوم الآخر خاطره ما يضيجي

ماهوب مثلي ضيقته دايم الدوم
أبي المليج اشوى وأزريت اليجي

على عشيرن كل حيه لنا قوم
وهو الذي من بدهم لي صديجي

حبه بنى بالقلب ضلعان وارجوم
ياليت مضنوني عليهن يويجي

حتاه يدري إني بفرقاه مظلوم
غصبن علي افراق ضافي الدليجي

إن كان هو مثلي فلا يلحقه لوم
عز اللخ إنه لي صديق ورفيجي

وإن كان عقبي حط قالات وعلوم
وأنا امصد رايح في طريجي

الله يعرضه الردي ناقل الزوم
اللي على العربان سده خريجي

حتاه يدري إنه بمسراه منجوم
اليا بلاه الله بخطوى الدفيجي