فن الملاحه - صقر النصافي

من منطلق فن الملاحه والطيور الطايرات
ماهمني ناسٍ تطير وناس معها طايره

عزّيت راس المال عن سوقٍ تبيع البايرات
ولاني من اللي جا يروّج له بضاعه بايره

من حر مالي لا بغيت اشري وحُكم الدايرات
حكمتها يوم السياسه فن حكم الدايره

ياللي تقول ان اليالي من بلاهن جايرات
اعرف ترى بعض اليالي من بلاها جايره

احذر تشب النار ودلالك عليها فايرات
ياللي تشب النار والدله عليها فايره

حتيش لو انك حدث وتصير ضمن الصايرات
منهو يقول انك مثال احداث قبلك صايره؟

شفت النجوم بحكمة الله في فلكهن سايرات؟
عليك بسهيل اليماني ,, كان تقدر؟ سايره