نوت - ماجد الزيد
نوت وش همّي من اللي يشمت بحال الهوى
وانت ِِ لك ماطى قدم بالارض اشرف من عذول
كلّ ما مريت رجمـك ذيـب ٍ بقلبـي عـوى
عوية ٍ تشلع خفـوق الليـل يالرّيـم الجفـول
كل شريان ٍ سريتي فيـه يـا نـوت التـوى
التوى في غيبتك والقلب يـا نـوت امْغلـول
ما ذكر لـي وادي ٍ جيتـي لـه الا وارتـوى
من حنين ٍ اللي كفخ لا جاب له علم ٍ رسـول
نوت يا وجه البشير افـداك عمْـر ٍ ونْطـوى
ما انطوى الا طوى روح ٍ فدى نـوت البتـول
لو كشحت ضلوعـي الا تنظريـن الإْشتـوى
لا يغرّك من شموخ الجال .والخافـي يهـول
لعنبوا حيّك انا والقبـر الاظلـم مـن سـوى
ميّت ٍ يا نوت بعدك يا عسـى عمـرك يطـول
المعنّى قـد ترجـل عـن جـواده وانـزوى
في حمادت نوت موته نجـم ٍ وجـاه الافـول
يسعد الله الجنون .الحـق مجنـون اسْتـوى
والْعَقَلْ له حزّت ٍ لا قيـل ماجـد .وش تقـول
ويش مجنون ٍ دماغـه الـف عـلاّم ٍ حـوى
ما يطيع بحبّ نوت ولو لحق عظمـه نحـول
الهـوى داء ٍ ونـا يانـوت مابغـالـك دّوى
بل طلبت الله يزيده .يـوم اركيـت الحمـول
ما يميْزه غير قلـب ٍ انكـوى منْـه انكـوى
هو يعرْف الحـب قولـة عاقـلٍٍ ولا مْهبـول
نوت لك عهد ٍ مدامي حيّ و آشـم ّ الهـوى
مقفـل ٍ قلبـي بقفلـك لا يفـكّ ولا يــزول
كم اصاب العشق سيّد مـن شديديـن القُـوى
خلّفه مقتـول ينعـى مقتلـه ضبـحَ الخيـول