هل العليا - ماجد الزيد
حضرت ونجد ترقبني ويتقصّى قصر صاهود
حضرت أسرع من الريح الكنوس إن جت يمانيه
حضرت وناشفن ريقي وبآ رد لي على مورود
فراتن عذبن ائْجاجن نقيّ وصافين ميّه
زلالن مثلما قد قال عمرو التغلبي بل زود
بني وايل وغرتهم رويل اهل العلائيّه
هل العليا رقوها سنود وكل العالمين شهود
فساس رويل عدناني وراسه بالسّماويّه
رويلي طيب(ن) وجيرة وخوّة مثل ريح العود
يفز فزعه شماليه شمال المرجلة حيّه
رويلي إن جيت له يعني بلغت لغاية المقصود
تهون النازلة تفرج وتسرج للرجا عبيّه
عبيّة وامّها الجوبة وابوها مارد النمرود
مغيره لادعى الداعي تفز اسرع من النيّه
تفك العاني إن صوّت وذوّب صوته البالود
دخيل براعي العليا وبوجيه الرويليه
على النّوري على نواف بدرن والليالي سود
على قبر المهاب الشيب اورنس(ن)بشاميّه
على ارونس يعني بو لبد يعني كبير اسود
هو الجرفاس بل جيفر وهو ليث الهزبريّه
على ناوي على الدّغمان كل قرم(ن)مقام وعود
نخاوي والنخاوي في صميم الخالدي كيّه
يحول الحول باثر الحول حال وحول والملهود
يحزّه سيف توباته ونوبات النداميّه
يموت الفين موته كل يوم ٍ والعباد رقود
وقلبه ينطبخ مثل الذي لادغته الحيّه
تضاحكْه المنايا كل مايسمع خطاوي جنود
وكل صبْح ٍ يظن الشمس جاءت بالقصَاَصِيّه
منيّه عن يمينه واقفه بالأبهر الحاصود
ونطْع ٍ ظامي ٍ تحته تعطّش للدمائيّه
تذكّر زلته واطرق . تنهّت وانطلق بارود
واتبعها بغفرانك . فنفس العبد مبليّه
أبى الشّيطان واقسم يوم ذله عاصي المعبود
ليأتي لابن ادم كل لحظه للفنائيّه
حضر بين الكرام ابليس وشبّ الشّر وصب (ا)وقود
واقفى عنهم خنّاس شايل له هجينيّه
من ادم لين نوح ٍ وهود الى سيّدهم المحمود
الى ذا السّاعة السّاعة وابليس ٍ على ذيّه
يرود يكود شرّه زود حتّى يومه الموعود
فيشعم صدر كل مؤمن بزفراتن سموميّه
ولكن للزلل غفّار دام ان النّفوس تعود
حليم(ن) غافر(ن)توّاب دام الشّمس شرقيّه
وراعي الحق من حقّه يشيل الرّاس . لامنقود
ولكن العفو شيمة منابتها عروبيّه
ومن اقسم بمشهود(ن). بوالد . واقسم بمولود
ربيعة مع مضر اعمام في حق النزاريّه
بني عمّ لبني خالد بني وايل نزول صعود
تحامينا على الدّنيا من الف ونصّ حوليّه
بذي قار ٍ شواهدها عن اوكار الحرار نذود
عرب يوم الكَرَب يحمي حدينا عن بني خيّه
بني وايل بني خالد مهي طوشة حصا لاعقود
من ايام العدو سابور ساسان المجوسيّه
خرجنا عن نجد والسّاحل الشّرقي بعد معدود
ابا الله غير يجمعنا فحمداً له بجوفيّه
تخاوينا على وضح النقا ذ مود وذا مودود
نفوسن الين من القز وصدورن شماليّه
ونا من لابتن هامه عظيمة شامخة كالطود
بني خالد حسام الله وعزوتها قريشيّه
كبار بيوت واهل سموت والجبري لها عامود
وقد حُمّلت حِملاً يُثْقل جبال التهاميّه
من عريعر اميري وكلّنا في ظل ال سعود
هل العوجا ونا ألاعْوج إذا العوجا سعوديّه