الهنوف - ماجد الزيد

اعرفك واجهلك واعشقك كلّي لك
غامضه واضحه ويشِ قصّة هلك

قاهره ساحره مُتعَبه مُتعِبه
لك يذل كل اميرن عزيز ومَلِكْ

لو تمري على كل ارضن قفر
اعشبت وانورت لك ربت يامَلَك

ماعذبك ما افتنك كلّي لك ما حسنك
فارعه شارعه نيّره كلّي لك

جلّ ربّن خلق حسنك وركبك
جل من صورك جل من عدلك

كن حسنك اتى من جنان الخلد
حط في ارضنا ولّ يا ماجملك

بوصفك ياهنوف(ن) لطوفن عطوف
كي ماتشقى بحور الشعر ببدلك

وجهها كالبدر لابدر واستمر
مع خدودن ورودن حمر تندلك

والشفايف جمر الا موتن حمر
تذهلك تحرقك تذبحك تقتلك

خلفهن ابيض الثلج صافي السنون
ثلج ونار اجتمع كلهن في فلك

والخشم لاضحكت لاحكت لابكت
غمد سيف(ن)لتلك الهناديّ تلك

والحواجب رسم مثّل سيف الحسم
قلبي ناشك على غفلةٍ ما امهلك

والعيون العيون العيون العيون
تذبحك ياولد بالرمش تسملك

والصدر منها بارزن خارزن
كنّه اليا شهقت فز خيلن فلك

والحشا لاحشا منهلس منملس
اولك اخرك اخرك اولك

خصرها عود راكن دقيقن نحل
لو يولّج وسط مجولن به سلك

لامشت كل شيّن معاها مشى
لاوقفت كل أحدن وراها يلك

ولفخذ متخذ وضع حيطه حذر
يرتعد في شدد واقفن يصطلك

مزدهر مدهر صبّته للقدم
اسفله بارفعه باوله مندلك

ساقها منبرم والمفاصل بها
كنّها محيّره في حرير السلك

سترها شعرها ان فلّته وارخته
لفّها عفّها مثل ليلن حلك

زلزلت خافقي يوم عنّي ابعدت
ويل من تهجره في هيامه هلك

بعدها همت في كل واد وقفر
لين صاح الحجر باكين رح هلك

السبع رابضن والضبع خافض(ن)
يرقبنّي ولا حولي من منسلك

شفت موتي دنا ثم شلت القنا
قال وحش البلا حبّك مسربلك

قلت تعرف كلام البشر تنطقه
قال من جاورك يذْهَل ويذهلك

غارقن بالهوى والغلا ذابحك
كل يوم انتسمع معك بجزلك

الغرام الذي عذبك وانهكك
له سكن كل وحَش والسرب ظللك

والحبيب الذي يافتى باعدك
نطلبه بعد قطع الحبل ياصلك

قلت له وصّ ذيب الوفاء يبلغه
ويْعوي له ترى ماجد(ن) يطلبك

مات قلب الفتى من بعدك وفنى
ارحمي ماجد(ن) والله يحللك

لايطول الغياب الزعل والعتاب
لك يهون العمر على كف ازعلك

خفّفي واصفحي واسمحي وادمحي
تاب عن زلته للولي ثم لك