ياشاعر المليون - متعب التركي
ياشاعر المليون لا و اخساره
حطّوك يالمليون طعم الجماهير
تنخى وكنّك نازلٍ وسط غارة
ملهود ومقيّد ولا تقدر تغير
لا يغرّك البيرق وشِدّة حَمَاره
خِرقة .. وماتسوى من الجاش تعبير
شفت الأدب وشلون غّير مساره ؟
لو إنت الأفضل قِيل ماقبل الأخير
ترى السبب واضح .. وهاك إختصاره
من لجنةٍ عميا ومن دون تفكير
ياكثر مايخطون تارة وتارة
يا للأسف غشمٍ تقيّم شواعير
يامدعي بعكاظ صَلّ إستخارة
سوقه بريٍ شام عن دهنة السير
برنامج المليون هذا شعاره
الصوت للشاعر ويَبشر بتمرير
ياقايد القوّات راع الأمارة
بَنيت لك صرحٍ خَطَف ناظر الطير
لاشكّ مقصودك وهمّك تجارة
ومثلك مهو محتاج جمع الدنانير
حطّيت مليونك من أجل الإثارة
والصيد من جَيْبٍ يصوّت بتكرير
هذي ضَعافة ماتسمّى شطارة
منك الأوادم يشتكون المخاسير
تستغفل العالم بقولة حضارة
حضارتك ياشيخ .. تحتاج تجبير
طهّر بلادك من جذور ( ... )
ولاّ القصايد .. ماتبي منك تطهير
الشيخ مثلك يستحي من وقاره
وشلون ( نشوى ) تحذفه للمحادير ؟
وإن كان للأشعار بيرق وإدارة
ياللّي تقول إنّ القصايد بك إتجير
ترى الفلسطيني سلاحه حجارة
ويصيح بأعلى الصوت محتاج تحرير