لعب الدراري - صلاح الطويل
نترة ورى نترة
وكل نترة بعثرة
وكل عثرة بزفرة عميقة
وكل زفرة
بدكة وتلصيقة
وحدة ورى وحدى
سخا الموري طالت الكعدة
آش بقى بعدا ؟
من غيرو وزفيرو
طالع من ضلوع تتلاشى
خوى المجمع
وتجمعوا الكراسى
آش بقى بعدا من المقطر
فتعصيرة وحدة , غير الكعدة
والدرب خوى
لا من فجوة
يدخل منها الهوى
غا البيات طالق عينيه
على البيبان المسدودة
القفل كبير
السكات والهدير
وحدها قطوط الليل
تحيل في نص الليل
صواتها مسموعة
مشيت وجيت
وتكول عييت
لحت خطوة لخطوة
وحدة تخلف... وحدة تلوى
مرة بكية بشهقة
مرة ضحكة بنهقة
مهزوز فوق الما
بحال الورقة
مشيت وجيت
شفت فالساعة لقيت
نفس التوقيت
قلت إخ...تفو...خزيت
آش تسوى ؟
***
قلت نطلل على ولاد الدرب
حيدت الزرب
عيطت عيطة
وعريت الغطا
لقيتهم مجموعين على السوطة
طاح السوط على السوطة
وضاعت التاء المربوطة
الاصوات تخنقات وسط الاسواط
كلها بسوط
ولي ماليه سوط
فوقو سباط
عيطت عيطة على الرباط
وجرتني رنة الأبواق
مابقيت نشم غير ريحة الشياط
دورت على الرفاق
وأنا مشتاق
لقيت الصحبة غيرات الرحبة
تلاحت وسط المراق
جاتني الدوخة
مابقيت نفرق بين الوجه والقفا
جمعت الوقفة
وعيطت على الصفا
لقيت الخواض يدردك
عاود دردك
والمعقول على الشوك
واقف بالحفا
دخلت لديك الغرفة
لقيتهم نايمين
كي دايرين
كلها فيديه مغرفة
مبيضين
مصافين
القباب منيشين
بحال السفة
مزوقة بالقرفة
تبارك الله عليهم الشرفا
***
دورت على كلامي
تلفات ليا المعاني
بقيت مهول كنسول
قلت مابقى علاش تعول
قطعت للطريق الأخرى
كندور وأنا مكور
ضربني عفريت فباليما
قالي هنا سالينا
راك مهور
لعب ولا حيد
راك معروف ومقيد
واختار واعزل
يا مسرج
يا مفرج
قلت آسيدي أنا عييت
وخرجت كيت
مسموح لي نتفرج
ودرت بلييصة
مع الخوت فالمدرج
وسهيت كنتفرج
مزالة هي هي
مزال فيها العكابي
أرى ماعنك من جهد
أرى ماعندك من ركابي
غابة وعامرة وحوش
لاقانون فيها من غير فلوس
وافينك...وافينك...؟
وا....حمو رابي
قالها جحا ومشى
مابقى مايتخبى
لي عطى الله بقى
فقيعان الخوابي