يجمعنا الطبل - أكرم التلاوي
تِحضّر يا جرح وانسى صراخك واكتم الزفره
تألم داخلك واخرس لسان الفلسفه واكدح
تِلحَف بالصبر والغي يراعك واكب الطفره
وباء الجهل مِتفشّي وبه نص البشر ترزح
مَنِت ( فَلتة زمانك ) لو تجازف في بلع شفره
تِقطِع جُملة أوتارك تئن وحاسدك يفرح
تصور لو تشوف اعمى ترنح من شفا حُفره
فلا تبسط يدَك دُفه يشدك لو عجز ينجح
واذا شفت العرب تهرب ترأس مَطلع النفره
يجمعنا الطبل دايم تفرقنا العصا ونشطح
ترى ما كل ما يلمع ذهب لو تكسيه صُفره
وترى بعض الأمل يخدع ومرات الصدق يجرح
تبلد يا القلم واترك منهو كافر بكفره
ولا تكتب ولا تشعر ولا تجمع ولا تطرح
فلا عاش الشعر واعظ ولا كل البشر سُفره
ولا الصالح ولا الطالح يبي يسمع ل احد ينصح
عشقنا دروبنا العوجه عشق ل الاصبع حضن ظُفره
فلا عاد النصح يجدي ولا ترك النصح أصلح
تخيل هالعقول أرض ٍ يباس ٍ موحله قفره
قبل تحصد ثمر منها وجب تحرث بها وتفلح