أحلام طين - أكرم التلاوي

يا فهد تدري وش علاج المحبين ؟
لا صارت ظروف الزمن مستبده

يدروا بإنهم طين وأحلامهم طين
والموج كل أحلامهم مي بقده

مثل الخريف العشق والواقع التين
والتين صعّر للعصف كل خده

نعشق وندري كم قبلنا مساكين
أحلامهم ما تجاوزت هالمخده

الحب أجمل لا بقى بين قلبين
ما باح قلب لصاحبه يوم سده

نشقى وندري للنهايه عناوين
من قبل لاياصل بنا العشق حده

تقدر تقول إنا نِدَوْر العنا/وين
ونروح نفهق صدرنا لين عنده

يا فهد انا مبلي إلين الشرايين
باللي اجتمعبه كل شي وضده

فيه الغرور إلي تمازج مع اللين
وفيه التواضع مكتسي ثوب شده

قاسي تقول بقسوته ماإله دين
حاني تشوف برقته ألف ورده

يا فهد لو هو يطلبك ضي هالعين
تيجي ترده وتعجز إنك ترده

يهتز قلبي بشوفته يا فهد لين
أشعر بإنه باس صدري يهده

البين ما هي شوفته بس والبين
الاكبر إذا غمازه إغتاب خده

وهقت نفسي فيه يا فهد والحين
لاني كسبته لي ولاعشت بعده

ما قلت لك كل الحبايب مجانين
حبل الوصل مقطوع وإحنا نشده

يا فهد تدري وش علاج المحبين
لا صارت ظروف الزمن مستبده

يما نساير وضعنا وناكل الطين
يما نموت ويبقى للحب مجده