نورة - أكرم التلاوي
نوره ولا اهتزت شفايفها يطيح
كل الكلام اللي تبي تقوله صدى
غصن الكلام اللي بداخلها شحيح
ما به ثمر لكن عليه من الندى..
إلا جمعتَه تَمطِر الكون الفسيح..
غِيمَه من شفاها على الناس الهدى
ما بين أصابعها حديث ما يبيح
ذمة بشر أو يرمي حروفه سدى
إلا انطقت سبابة ايديها( فصيح
كل الكلام بكل لكناته غدا )
تقرا شفاه الريح يوم الهرج ريح
وتقرا شفاه الطير لا منه شدا
وتشكـّل ايديها حديث به تزيح
غشوة هدوء وكنّها تحاكي المدى
في وحي أصابعها نبت حلمٍ جريح
في صمتها حزن بملامحها بدى
صوت الأمل في نظرة عنيها كسيح
تحكي أصابعها ولا يسمع حدا
هي مثلنا نكتب رمز يوم الصريح
لا ضاق سقفه يعجز يوصل نِدا
ونوره لا منها اعجزت إنها تصيح
كل الكلام من اجزل ايديها ابتدا