حاجة الأنذال - أكرم التلاوي

على شط السهر والليل يسكب ظلمته بدلال
تقهويت السّهاد وقمت أهيّل وحشة سنيني

ولملمت الشتات اللي سكني وانقلب موال
عزفني واحترى فرقاي لاكنه ابتلش فيني

تذكرت العلوم اللي تزلزل من حملها جبال
وجتني همها حتفي وأنا المخلوق من طيني

تهيت في غدر الأصحاب جتني وادبرت تختال
وقدرت تستفز الشعر فيني يوم تغويني

نذرتلها من ابيات الشعر ما يلجم الأنذال
وانا اللي قد خلقني الله (طين وشعر ) تكويني

قصيدي للخوي رحمه وسحاب من المطر همال
وعلى عداي الشعر لعنه ليا ثارت شياطيني

أوردهم على جهنم لظاي معَريين اذلال
وامشيهم على صراط القصايد في مياديني

وانقيهم نقا يعني أغربلهم على الغربال
أبتعلم من أخطائي ترى اللي شفته يكفيني

سنين ابذل عطا وازرع ورد وأكرِم بدون آمال
لصحبي وابتغي رحمة إلهي مع رضا ديني

ويوم اللي بلتني دنيتي وتكاتفت الأهوال
جفاني من حسبت انّه على نفسه يبديني

كذا الدنيا تجيك بحال لكن ما يدوم الحال
وكذا اصطفت سفن جرحي على مرفى شراييني

كذا شراع الوفا تشقق وساري لملمتنا مال
كذا عرفت الخوي يلي يبيني ومن يعاديني

كذا دنيا التجارب علمتني وانجبر بي الحال
وكذا زانت بي الدنيا وسألت الله ينجّيني :

من اصحاب المصالح يا إلهي وحاجة الأنذال
ومن اللي يبسم بوجهي ولا قفيت يهجيني

ومن اللي ... وادركتني شقشقة نور الصباح وسال
حديث الدلّه الخاوي من السكره يصحيني

وفُقت وما لقيت الا على جيد الشِعر سلسال
بعد ما كان له مده هجرني ما يدانيني

تحسبت العلوم اللي اجتني وادبرت تختال
وقدرت تستفز الشعر فيني يوم تغويني